抽水兼呃like呢家嘢，似乎係會上癮㗎！好似自由黨榮譽主席田北俊咁吖，佢嘅facebook一向係網民至愛，一時貼眼鏡豬相諷刺豬一樣嘅隊友，一時又着短褲諷建制派WhatsApp洩密元凶，就連最近身在海外都要特登走入熱廚房，留言話如果大廚唔掂，點會有人肯幫手，暗寸CY無朋友。
同樣愛抽水兼呃like嘅《100毛》，似乎對田少出神入化嘅呃like作風覺得好啱key，噚日喺fb向田少招手，請田少做佢哋fb管理員，因為「見你做得幾好」，又話《100毛》「上上下下都是豬一樣的隊友，絕對可以跟田生你打出一片天」。
劉華再被抽水
要請得郁家財萬貫嘅田少幫手，相信唔少得銀彈政策，毛孩對此卻大賣關子：「至於我哋請唔請得起你呢？……嗯，我有信心，只要我哋請咗你，我哋就有錢請你㗎嘞。」佢哋仲向田少細佬田北辰求助，留言希望二少幫手搵阿哥。
八方都估唔到，身在夏威夷嘅田少喺毛孩發出「招聘」呼籲後冇耐，即刻留言：「人工係咪高過劉華先？」快靚正嚟個反抽之餘，仲寸爆仕途好似坐咗白金升降機嘅新任民政事務局局長劉江華，三扒兩撥又獲網民激讚，難怪毛孩想田少幫拖。
意外驚喜係二少亦玩埋一份，喺fb回應話毛孩一向「神通廣大」，早前佢哋嘅王牌節目《六點半左右新聞報導》，主播東方昇都打過電話搵佢阿哥，所以應有佢阿哥電話，但補充一句：「大家都知佢喺外國熱廚房，聽唔聽到電話就唔知喇。」
呢對田氏兄弟冇畀毛孩嚇親，反而越玩越大，毛孩都甘拜下風，《100毛》喺fb總結：「原來田氏兩兄弟都咁識玩！好嘢好嘢，毛毛最喜歡有幽默感嘅人。今次畀個叻叻你兩兄弟！」
李八方
mailto:[email protected]