《財富》雜誌公佈2015年度環球500大企業排名，當中最賺錢嘅唔係賣iPhone賺到盤滿缽滿嘅蘋果，唔係油企埃克森美孚，而係工商銀行（1398）。
根據《財富》數據，工行上個財政年度盈利447.63億美元，成為全球最賺錢企業；排第二先係科技巨擘蘋果，同屬內銀嘅建設銀行（939）都進佔三甲，埃克森美孚只排第四。
500大企業最賺錢頭十間企業中，就有4間內銀，除咗工行與建行，仲有農業銀行（1288）與中國銀行（3988），分別排名第五同第六位。美國大行只得富國與摩根大通，分別排第七同第十。
今年美國就有128間公司上咗500大企業榜，中國與香港企業共有98間。《財富》指，呢98間公司當中，只有22間唔係國企，其餘全部有政府撐腰，表現梗係穩陣啦。