底子極紅嘅民政事務局前局長曾德成被炒，由民建聯出身嘅政制及內地事務局副局長劉江華頂上，輿論一片譁然，質疑民建聯既然會大舉派員參選區議員，再由劉江華執掌負責分配地區資源嘅民政局，有利益衝突之嫌。有泛民中人就同花生友講，利益衝突固然係一個問題，但查實劉江華做民政局未必對民建聯係好事。
泛民譏「二五仔底」
泛民中人話，劉江華素來被譏「三姓家奴」，或者講得白啲根本係二五仔底。今次CY搵劉江華做局長，足證劉江華得到CY信任。而回想政改一役，當時任副局嘅劉江華零表現下，卻依然獲CY信任，佢口衰衰咁話，都唔知係唔係劉江華暗地裏向CY篤過政改三人組背脊，或者幫CY𥄫住政務司司長林鄭月娥有功，因此獲青睞？
佢覺得若然係咁，劉江華做咗民政局局長後，更加可以大條道理贒實民建聯。又多個人支笛要聽，對民建聯嚟講係咪好事呢？
另有親北京人士向花生友分析，CY要做埋餘下任期唔係問題，但到咗2017年特首選舉時，係咪可以獲阿爺支持連任就好難講喇。呢位親北京人士仲話，如果CY突然換走兩位局長，係為咗顯示北京仲聽佢講嘅話，呢個做法不太明智；至於點唔明智呢？呢位親北京人士冇多作解釋，但花生友相信，佢係講緊CY呢鋪賭局好博，萬一換完人仲係施政不善，就唔好有怨言嘞。
花生友