盧卡古「換」史東斯？摩連奴（圖）似乎同愛華頓過唔去！
英格蘭土炮搶手，但係表現同戰力多數唔成正比。去夏最貴土炮轉會五大交易，涉及修咸頓沽貨佔其三，包括3,000萬鎊賣左閘勞基梳爾去紅魔、翼鋒拉爾拉拿2,500萬鎊過檔利記，同過千萬鎊賣咗守將哥林張伯斯到阿仙奴。剛過去球季表現，前兩人開季即傷，喺新球隊可有可無，季尾表現稍好。張伯斯上半季打謝咗，下半季信心盡失，淪為兵工廠大後備。
再睇番英格蘭國家隊，上個月歇暑前最後兩場比賽嘅球員名單，剩拉爾拉拿係上季高價轉會，唯一仲有入選仲踢得到；其餘身價順序最貴嘅勞基梳爾、韋碧克、張伯斯同門將費沙科士打呢類千萬鎊以上嘅「新兵」，唔係傷就係冇態，提早收「咧」。今夏標王史達寧，喺國家隊同位置嘅人唔少，有乜頭暈身㷫，新主藍月亮會驚啲。
史東斯屬摩佬保險
摩連奴兩季前回巢車仔後，未用過分毫買一位英國人；但近日卻突高調明搶愛華頓「未來英格蘭中堅希望」史東斯。人哋嘅後防核心，但去到車仔，今季多數做大後備，叫價值唔值去到3,000萬鎊，要問摩佬至知！不過除咗泰利年事已高，睇得出摩佬唔多信上季表現一度大跌、年尾30歲嘅加利卡希爾，要冧莊英超，點都要買多個保險。
愛華頓兩季前成功力阻巴尼斯過檔前帥莫耶斯嘅曼聯，話晒近五季都有兩次喺聯賽排名，壓倒同市嘅利物浦，上季電視轉播筆獎金分到逾7,700萬鎊，未必好恨車仔呢單「刁」之外，佢哋今夏又放走咗迪斯甸同艾卡拉斯兩中堅，一眾高大嘅90後土炮加路維、加拔及布朗寧未接得上，冇埋史東斯，32歲嘅隊長菲臘積基爾卡幾難捱。
主帥馬天尼斯，上季用咗2,800萬鎊買斷車仔中鋒盧卡古，但「新魔獸」對比前季借用時，聯賽入球少三分一，得番10球，被車仔過咗一戙；若然車仔一年後，用到呢筆轉會費成功購入史東斯，馬天尼斯豈不是再被摩佬摑多巴？
車仔啱啱係國冠盃慘負紅牛，上半場用卡希爾拍上緊位嘅葛特蘇馬，滴水不漏；下半場泰利入替卡希爾後，車仔失四球。摩佬成場波坐喺後備席，蹺埋雙手，面唔算太黑。最愁可能係開季在即，點樣應付呢次挖角戰嘅馬天尼斯。
文：波神