特首梁振英連炒兩個問責官員成為官場佳話，噚日仲有消息話，盛傳炒人名單上仲有財政司司長曾俊華，但八方四出打探過，發現CY就算幾咁唔like鬍鬚曾，唔會亦唔夠膽郁佢，反而係有啲梁粉覺得鬍鬚曾阻頭阻勢，影響CY連任，相信係佢哋當中有人好想鬍鬚曾執埋包袱走人。
有政界中人笑笑口話，其實唔使為鬍鬚曾擔心㗎，一嚟鬍鬚曾係中央嘅人；若然唔係阿爺要求，佢呢屆都唔會留任做財爺，試問邊個敢郁阿爺嘅心腹？二嚟最近國家主席習近平金手一握，無論CY點樣強調佢哋係正常禮節嘅握手都好，政界中人對鬍鬚曾喺阿爺心目中嘅份量，心中有數，試問邊個咁唔識時務，夠膽喺阿爺頭上動土？
而且呢，乜梁粉陣營有人才做財爺咩？點解八方唔覺嘅？睇見噚日財爺訪問福建後落機返港嘅風騷樣，相信佢都知自己安然無恙。