特首梁振英連炒兩名問責官員成為城中熱話，口痕友都八卦緊會唔會再有其他問責高官被辭職，講來講去都輪唔到財經事務及庫務局局長陳家強，一來喺眾多局長當中，陳家強𠵱家已經算係最順眼嗰位，二來佢負責嘅財金範疇比較專門，應該唔係話換人就換人咁兒戲啩。
陳家強似乎亦懶理官場是非，繼續做自己嘢，佢下星期就會成個禮拜飛落澳洲開會，事關博鰲亞洲論壇下周四、五喺澳洲悉尼舉行，主題係亞太經濟增長與合作願景，陳家強係其中一位演講嘉賓。
華華查閱嘉賓名單，參與嘅內地政府官員主要係人民銀行行長助理張曉慧。
陳家強諗住因利乘便，下周一就飛過去，先同澳洲嘅監管機構、金融企業代表會面，仲會睇睇當地嘅金融科技企業，睇吓有冇嘢可以偷師。