體壇拾趣：
占士都玩Space Jam?

「大帝」又想挑戰「波神」地位？大帝勒邦占士（LeBron James）一直被視為波神米高佐敦（Michael Jordan）嘅接班人；MVP、冠軍指環，佢都已經到手，連現役「第一人」嘅地位都一早確立埋。𠵱家大帝就有機會追趕MJ嘅另一個傳奇──就係拍《Space Jam》（太空也入樽、小圖）嘅續集嘞。
占士有份客串嘅戲《Trainwreck》呢排先喺美國當地上映，但冇幾耐又宣佈新搞作。佢投資搞嘅娛樂製作公司周三同華納兄弟簽咗約，未來將會喺包括電視、數碼同電影方面計劃合作。呢單消息一出，最期待嘅唔係商界，而係一班籃球躉；皆因華納兄弟就係製作當年MJ做主角嘅《太空也入樽》電影公司，𠵱家佢哋就宣佈同「新MJ」合作，仲唔係傾好出續集？

新科入樽王都Like爆

對於80後同90後籃球迷嚟講，呢套戲真係經典中嘅經典；連新科入樽王拿維（Zach LaVine）今年二月贏明星入樽賽，都係用《Space Jam》做主題就知。若然續集真係拍得成，球迷可以懷舊一番之餘，繼續撈過界嘅大帝，仲隨時可以變影帝㖭。