【維基解密之光輝倒數】因為一場電視大戰，一度令娛樂圈風雲色變，因為「一男子」因素令不少人願望落空，甚至近日在黃金時段出現雙線國產膠劇，縱使港視有題材新鮮的《三面形醫》，亦無力扭轉乾坤，難怪首度擔正的艾威說：「點解我哋水準係提高咗，但原來係唔能夠生存？」林文龍更說：「我哋𠵱家面對呢樣嘢，最大損失係啲觀眾！」
撰文：何慧斯
港視雖然仍有兩宗發牌的司法覆核案未了，可惜前景仍不樂觀。港視將於今日播出以整容為題材的《三面形醫》，艾威、林文龍日前與楊淇宣傳此劇，艾威先說：「欷歔㗎，都冇諗過咁大個仔，等咗30幾年終於有一套戲份重啲嘅戲，斷呎計可能係香港電視史上最貴嘅廠景。」他續說：「但事實上個行頭係窄咗，成件事唔係咁樣，點解我哋水準係提高咗，但係點解原來係唔能夠生存？呢個係一件好無奈嘅事。」
提到近日國產劇攻陷無綫黃金時段，文龍說：「最大損失係啲觀眾，因為你冇得選擇，演員好被動、亦都冇辦法，係一份工，你簽得呢間公司自己要幫佢做嘢。」說到港視台前幕後前路未明，養妻活兒亦有困難，他更有感而發地說：「我哋係喺香港700幾萬人裏面嘅其中一個，可以做到啲乜嘢？」
入股拍戲謀出路
但曲終不一定人散，文龍入股黃玉郎的電影公司做老闆，艾威加盟旗下亦參與不少演出，文龍說：「地球每一日都喺度轉，第二日擘大隻眼你嘅生活都要繼續過，但係有好多嘢唔係操控喺我哋對手，你話亞視以前風光嗰陣，又點會估到有今日？之前一路都做緊兩間電視台，大家都唔會估計到有港視嘅出現？𠵱家冇咗港視，亦唔代表將來會世界末日，可能又會有另一個景象，我成日都話好多嘢唔好睇得太灰，先決條件必須裝備好自己，如果唔係機會嚟都會流失。」他續說：「𠵱家組織緊間公司，去追求我嘅理想，好多嘢真係講天時地利人和，如果冇港視，可能我仲喺嗰啲電視台日拍夜拍，如果有港視，可能又冇咗呢個拍電影渠道，所以有好多嘢有得必有失，真係有安排。」
塞翁失馬天安排
即使對艾威而言，失去的損失遠比得到的要多，不過他從未後悔離開無綫，他說：「絕對冇後悔，呢兩年我經歷咗好多，覺得係上天安排，好似我太太身體出問題，差唔多死，執返條命算好彩，當你面對生死，一切都變得唔重要。假如冇行出呢一步，我同過去嗰33年冇突破，可以話人生係冇乜意義。」
楊淇在劇中一人分飾兩角，談到近年電視業興衰，她一直在旁細心聆聽，她說：「 我唔知以前光景係點，可能我個人比較樂觀，有啲人見到希望就會堅持，有啲人係堅持咗就會見到希望，我係後者，我唔想畀大氣候去影響自己，想做就去做，就算個市好差，但係好時光一定會到。」
場地提供：海景嘉福洲際酒店
林文龍 服裝：Ted Baker
艾威 服裝：Cheap Monday
楊淇 服裝 : iBLUES
化妝、髮型：Suki Cheung