大行研究報告一般都比較公式化，對唔少投資者嚟講都非常之枯燥無味，不過噚日就有一份由大和資本發佈嘅長江基建（1038）報告，封面設計非常有創意，將李嘉誠、李澤鉅、霍建寧畫成卡通，以「what's cooking?」為題，預測長建未來可能同電能（006）合併。
長建主席係李澤鉅，圖中李澤鉅就頭戴主廚帽，左手持鑊柄，右手拎鑊鏟，一口氣煎四塊牛扒，分別係輸氣業務、基建、電力、水務，鑊氣十足，李嘉誠、霍建寧就企喺身後，各拎住一支秘製醬料，十分神秘。其實長建與電能合併呢個講法，喺市場已經流傳一段時間，大和分析員用幅圖吸引人睇佢寫乜，都算係用心良苦。