胡杏兒舊年同夜場Play老闆Philip Lee（Phil）一撻即着，好快已經去到談婚論嫁嘅階段，噚日有報道話杏兒同Phil會喺今年12月28號喺英國行禮，香港就未知會唔會補擺酒。35歲嘅杏兒到咗適婚年齡，而Phil一直都好想組織家庭，所以拍拖3個月已經求婚，佢哋5月仲去咗馬爾代夫預支蜜月。
做婚紗店生招牌
杏兒同Phil揀喺英國行禮，係因為杏兒曾經喺北愛爾蘭讀書，而Phil就喺英國長大，仲有唔少屋企人住喺英國。事業心重嘅杏兒忙住喺大陸搵真銀，又啱啱轉會去蕭定一公司，佢有份開嘅婚紗店又喺下個月開張，希望以自己嘅婚禮做生招牌，不過婚禮暫時由Phil一人籌備，聽聞Phil仲叫咗吳嘉龍同巫雨平做兄弟，杏兒嘅姊妹團就有「胡說八道會」成員黃智雯及姚子羚等。
報道又話杏兒想喺輕鬆嘅氣氛行禮，所以暫時只係請咗好少親友去英國觀禮。噚日馮仁昭問過杏兒有關報道，佢噚日透過WhatsApp表示：「唔回應喇。」
撰文：馮仁昭
