台灣出世的一名本港前𡃁模，向世界出發執馬屎！
「Hi，大家好，我現在喺新西蘭呀！」
曾做過𡃁模嘅索女Paris陳穎，近兩年事業愛情走勢凌厲，做咗馬會節目主持，又成為本港練馬師告達理兒子告卓賢（Martin）嘅女友，自己仲開咗間網上餅店。今個暑假佢同Martin去咗新西蘭，不過唔係渡假，而且體力勞動執馬屎！
原來Martin喺當地練馬，搞咗個Winmark馬房，近日更勝出一場賽事，Martin嘅父母都有去新西蘭撐場。由於Paris想將來幫吓未來老公手，於是「夫唱婦隨」去當地跟Martin學習馬房工作。
Paris話：「好辛苦呀，凌晨三點半就要起身，四點要準時到馬房，執吓馬屎搬吓木糠，啲工具好重吓，而且我啱啱開始學嘢，佢哋暫時唔畀我掂啲馬！」
係咪好唔慣呢？「都預咗做粗重嘢，相信慢慢會慣，只係實在太忙，全日零化妝素顏見人，係咪冇咁靚呢！」咦，其實Paris冇化妝個樣都好掂，唔使擔心喎！