講起「鉛水」何來，鉛水源頭何處，以致到啟晴邨居民飲水要思「鉛」，真不知從何說起。一位老牌屋宇設備工程師對左丁山講：「我地細佬哥年代，從無諗起鉛水嘅問題，用鉛水管飲含鉛水多年，現在仍然唔覺身體有事吖，但時代不斷改變，以前大家在寫字樓開會，全部係男士，人人吸煙咁滯，接客入門，第一件事就係遞茶遞煙。現在你在室內食煙呀，俾人趕出門外落樓下罰企先至可以食一枝煙，即係話，以前可接受之事，現在被視作社會異端。我係工程師，處理鉛水係一個理性問題，認為不須驚慌，唔好人嚇人。但普通市民就視之為一個感性問題，一定大罵政府唔啱，承建商疏忽，何標記林德深成眾矢之的。政府講理性，就會俾人攻擊為唱慢板，不理民間死活，講感性，又會俾工程師科學家批評為冇專業精神。梁振英碰上呢類『民生無小事』，只能講係時運低。」
理性與感性糾纏不清之際，適逢三個幾月之後有全港區議會選舉，民主派與民建聯及工聯會勢必鬥過你死我活，鉛水想唔政治化都幾難。首當其衝嘅建築行業又點睇？一位資深工程師在外資公司工作，在馬會飲茶時碰到，佢猛話夠運，有乜運呀？資深工程師講：「我地專做基建，少興建樓廠，呢次榜上有名嘅建築承辦商主要係中國建築、瑞安、協興、新昌等等全部係建制派、民建聯/工聯會唔敢破口大罵，如果係外資英資承建商呀，議員仲更加嘈到坼天呀！」
資深工程師話有一個憂慮，怕個別屋邨事件將來會演變成「系統性風險」，主要原因係目前建築工人高度短缺，工聯會死都唔肯同意輸入外勞，故此工程難以如期完成，超支壓力甚大，承建商利用投標/分判制度將成本壓力向下推，否則無法向政府交代，政府又無法向立法會交代。招標就係價低者得，分判就係最下層分包商為咗賺錢，鋌而走險，用最便宜之內地製造物料。唔係有spec（用料標準說明）嘅咩？資深工程師話：「內地連大閘蟹雷射貼紙都可以造假，建築材料說明做到幾靚，幾國際化都得。政府工程師只能抽樣檢查，抽到嘅係正貨，但不排除工人用到外牆上嘅係山寨貨，房屋署要人釘人方式普查先至可以阻止得到，限於成本，政府一定唔會咁做。」左丁山愈聽愈驚，以前外國建材貴，作假有個譜，現在內地山寨便宜貨/無良貨無限量供應，「造假減料用次貨」衍生嘅金錢誘因實在太大！