隔牆有耳：
9.8米飛翼高達飛入時代 - 李八方

Wing Gundam喺時代廣場起飛嘞！大家𠵱家行入銅鑼灣時代廣場，肯定會被懸掛喺2樓大堂，展翅高飛緊嘅飛翼高達（Wing Gundam Zero Custom）吸引住。點解會嚟咗香港？原來係「GUNDAM docks at Hong Kong II」展品之一，8月1日至31日同粉絲見面。

每晚燈光匯演重現戰場

要安裝呢個高9.8米嘅飛翼高達，實在好花時間同工夫。時代廣場發言人話，前晚11點開始裝嵌，途中發現難度超乎預期，每一條鋼索嘅承托力都要重新調整，而每次調整一條鋼索，其他嘢都要相應微調喎，結果搞到噚日朝早9點。
由於經過調整，Wing Gundam機身出現約4、5處需要補油，𠵱家用紙包住，估計下周二或周三就可以完成，相信可以如期8月1日展出。
另一個展品、巨型3米闊綠色渣古頭，噚日亦已喺鐘樓上「戒備」。至於高7.5米嘅RX-0獨角獸高達（Unicorn Gundam）則29號先抵港，喺露天廣場展出，會以「NT-D」模式登場，並用紅色LED呈現動漫中嘅發光效果。
展覽期間每晚6至10點，獨角獸高達每隔半個鐘進行4分鐘燈光匯演，配合聲效及燈效，重現宇宙戰場情景。
呢個展覽計劃嘅幕後「指揮官」、項目創作及藝術總監泉勝洋話呀，渣古頭同飛翼高達均以Bandai發行嘅Perfect Grade模型為原型，主要用玻璃纖維製作，並以鋼架作支撐，希望藉此更多人認識高達。時代廣場話展覽會確保參觀者安全，並有專人24小時看守。