雖然國泰航空（293）近期有唔少負面新聞，但仍然係本港航空業一哥，吸引香港航空繼續參考佢嘅推廣手法。港航噚日就宣佈，首次推出暑期學生機票優惠，最平只售700蚊，吸引學生行萬里路，分明衝住國泰「popup&go大專學生飛」去砌喇！
港航嘅學生優惠由今日起至8月17日止，小學生、中學生、大專生都可以參加，目的地包括河內、台北、曼谷及北京等，未計稅費來回機票由700蚊起，比正價機票大概有六折至七折，但香港人好鍾意去嘅日本就冇份。
除咗學生優惠，港航啱啱先贊助完國際女排大獎賽，又贊助拍電影《衝上雲霄》，仲搶埋喺港龍航空好受喜歡嘅太興奶茶加盟，成為飛機餐供應商，推廣手法同國泰如出一轍。不過對於消費者，有着數就高興，所以市場確需要有競爭。