西甲兩大球王基斯坦奴朗拿度（C朗）同美斯邊個勁啲，呢個問題真係拗到口水乾都冇結論。不過C朗至少有一樣嘢係完勝美斯，就係佢全身越嚟越澎湃嘅肌肉，周不時淨係着剩條底褲示人，迷死唔少女粉絲。嚟緊新一季西甲，C朗嘅男神地位好可能受到新挑戰，華倫西亞新簽嘅澳洲籍門將馬菲賴恩（Matthew Ryan）都好鍾意「騷肌」，身形都好有睇頭！
華倫西亞喺今夏以700萬歐元轉會費，由比甲布魯日簽入23歲嘅馬菲賴恩，香港球迷或者對佢會有啲印象；佢喺2013年加盟布魯日之前，曾經喺澳職中岸水手踢過三季，仲贏過一次總冠軍，球迷有機會喺直播賽事睇過佢嘅演出。今年澳洲贏亞洲盃冠軍，馬菲賴恩亦係東道主澳洲嘅主力門將。
fit爆身型料成華倫正選龍
馬菲賴恩身高六呎爭半吋，但守龍唔係高就得；佢勝在反應快，有本錢喺西甲立足。加上原本華倫一號門將迪亞高艾維斯受傷，馬菲賴恩有機會喺新球季坐正。賴恩更吸引人嘅地方係佢副靚Body，六嚿腹肌加人魚線、心口仲紋咗個中文「帝」字。西班牙電視台Cuatro一個節目就拎住賴恩張晒肌肉相，去咗華倫西亞當地一個海灘做訪問，啲女泳客睇完流晒口水讚好，睇好佢可以喺西甲闖出名堂。
要睇到C朗同馬菲賴恩同場，最快都要等到出年，因為來季西甲皇馬對華倫安排喺尾二嗰輪，到時兩個肌肉男碰頭，睇吓C朗可唔可以射爆賴恩嘅……十指關喇。
佩雷斯急赴中國「救火」
C朗𠵱家身在澳洲備戰周五對曼城嘅國冠盃，之後會飛去中國繼續熱身賽。傳聞C朗喺皇馬越嚟越唔高興，上周六對羅馬見到加里夫巴利獨食嘅表現就更眼火爆；據報會長佩雷斯見勢色唔對，打電話安撫C朗，保證佢仍然係陣中唯一領袖；佩雷斯亦即將會去中國同球隊會合，兼同傳想過檔去曼聯嘅沙治奧拉莫斯直接會面傾吓。