新一代勁揪俠張晉，近期傑作是於拍攝《葉問3》時揮刀KO宇宙最強甄子丹，有份參演的《殺破狼2》又在內地突破五億票房。人紅了，捱了多年終於吐氣揚眉，走出來也份外令人眼前一亮，穿起西裝腳踏皮鞋，說不要再擺那些招牌功夫甫士，「要型，一個眼神就得喇。」對，莫非還要像某大哥一出來就要握緊雙拳那麼老套嗎？
撰文：趙潔恆
造型：陳蔚渝
攝影：郭賢興
化妝：Emma Lee
張晉最近在《殺破狼2》演大奸角得到一致好評，打得狠勁卻一身西裝骨骨，網民還大讚他的立立令髮型，打極都不走樣。拍攝當日張晉梳了個髮型，埋位前還自己噴定髮膠，對每件服裝如何配搭都頗有心得，照照鏡子挺一挺胸膛，鏡頭後甚為姿整，「我可能比Ada(蔡少芬)仲要姿整，基本上只要唔污糟就得喇，男人又未必要吓吓出街都着得好靚嘅，唔使太作狀嘅。」聲稱私底下都會好隨便踢拖的張晉，卻在攝影機前自信爆棚，勁chok交表情，擺甫士同武術功力同樣深厚。
放開做自己
拍照時奔放自如，但他自認性格內斂，早前張晉與太太一同現身內地真人騷《為她而戰》，也曾擔心會表現得不自然，「有時唔需要去扮演另一個人，以前可能會覺得做呢啲節目個人唔夠活躍不如唔好做，去做就要保持情緒高漲，但係我𠵱家覺得做番自己係最舒服嘅。」如果同女兒上真人騷，張晉亦不抗拒：「可以紀錄低同個女嘅相處時刻，我覺得都唔錯，因為自己拍都唔會有咁豐富，其實之前都傾好咗會拍，不過同《葉問3》撞期，睇下之後有冇機會啦。」
太太是後盾
觀眾最初對於張晉的印象，大多來自他是「蔡少芬的老公」，被標籤了事業上女尊男卑多年，他曾多次於訪問說過他從不介意，在金像獎頒獎台領最佳男配角時他說：「這輩子幸福都要靠她。」深情得令無數聽者動容，近來大眾開始會叫蔡少芬做「張晉的太太」，對於這樣的轉變，他不以為然，「事業上係要有成就感，需要觀眾證明，如果唔係就唔做幕前啦，其實以前講啲負面嘅嘢都冇影響到我哋，𠵱家嘅評價咁正面更加冇問題。我對稱呼冇所謂，同埋Ada一開始都係叫自己做張太。」太太更不時在微博大晒家庭溫馨照，又常常貼他的劇照，被內地傳媒封為炫夫狂，一談起她，鐵漢的認真臉上，瞬間柔情，「 佢唔只係一個快樂嘅人，仲會令身邊人都快樂，我本身係好內向、想法會有啲負面嘅人，但係佢令我明白快樂係有得揀。」張晉的腳上紋了「信望愛」三字，「都算係我嘅座右銘嚟，Ada最鍾意傳福音，係佢令我信教，亦都係信仰影響我嘅人生，喺我低谷時幫我好多，信仰同太太都係我兩個最大的後盾。」
成名不驕傲
張晉由武術運動員、武指再成功轉型做演員，當中辛酸難忘，但視之為成長的重要經歷，「嗰陣時會覺得大材小用呀，武術冠軍要做替身。我一直都想做演員，但搵唔到方法，就去做武指， 等待機會嘅時間好長，好煎熬，實會有懷才不遇嘅感覺，會問點解我唔夠幸運。」即使轉了做幕前演員，別人都覺得張晉只懂得打打打，一直靠當過運動員培養成的耿堅毅與耐力撐住，挨了十年才遇上了王家衛，讓人見到張晉還會演內心戲，終於在別人眼中成為真真正正的演員。「你問我紅咗會唔會飄飄然，係唔會，人大咗就覺得地球冇咗你唔會唔轉，人哋睇你唔起時，你要睇得起你自己，到人哋睇得起你時，你又唔好睇得自己太重要！好老套一句，勝不驕敗不餒，係我面對人生高低都記住嘅，咁樣心態會平衡健康啲。」
囡囡眼中的王子
張晉一拍戲便長時間離家，女兒曾問媽媽蔡少芬：「爸爸點解未返，爸爸係咪死咗？」要解一對寶貝女的相思之苦，便靠視像電話：「上次拍《葉問3》，佢成日話要睇我間房，又要去睇個potty(馬桶)，佢話係tea pot (茶壺)，要倒杯水畀我飲。」面對一屋女人，張晉說她們絕少爭風呷醋，「係個女話過爸爸係佢嘅王子，咁Ada就即刻話：『你爸爸係我㗎！』見到佢哋三個就好幸福好滿足。」
更多精采時尚內容，盡在 http://add.appledaily.com 。