劉江華真係犀利，佢越少嘢講、人氣越高，連藥廠都抽呢位紅人水。有隻「幸福要行多步」嘅藥，噚日發起創意新產品活動，徵集網民創意，佢哋拋磚引玉，自行研發出一款「幸福速效升職素」，盒內仲有隻垃圾桶瞓咗喺度，明寸劉局長噃。
幅圖連段簡介都抵死，藥廠話「有啲人一生沉默是金，但一炮而紅，究竟係因為『默默』耕耘獲得回報，定係得到神秘嘅力量呢？」，跟住就話「佢係食咗幸福啱啱出嘅新產品──『速效幸福升職素』！」
網民自創蒜膠素
網民嘅創意亦相當澎湃，太多啜核留言未能盡錄，八方姑且提兩個，第一個叫做「幸福咪走素」，解說：「最啱啲偽人食。講過『一支筆，一本簿，一張摺凳』嘅人冇晒影」，另一款係「幸福蒜膠素」，解說：「含天然黑蒜及蜂膠精華，有病醫病，無病保命，無效就『蒜膠素』咯！」