利物浦大軍已經喺周二到咗馬來西亞，準備周五對「馬國明」馬來西亞明星隊。冇份去嘅前鋒巴洛迪利（小圖）要留喺利物浦訓練，可能太無聊又想出風頭，喺周二曼城對羅馬場波賽後大讚入波嘅史達寧。家陣紅軍球迷將史達寧視為叛徒，巴神算點先？
巴神讚史達寧被轟
曼城喺周二場國冠盃同羅馬賽和2:2，再喺互射12碼贏波。史達寧首次披上藍月球衣上陣，一落場49秒就踩波車，但到兩分鐘就已經入波。賽後巴神喺佢twitter度寫：「做得好史達寧，最出色嘅回應，繼續努力。」之後仲懶語重心長咁叫班利物浦球迷要繼續支持史達寧。班利物浦球迷梗係唔多高興，唔少回覆都係抽巴神水，笑佢唔識入波。紅軍貴價新兵羅拔圖法明奴日前已經報到，呢位巴西國腳可以踢前鋒，巴神都係少啲上網，畀啲心機練波，唔係嘅話俾球會踢走都係遲早嘅事。