無論係咪做得唔好，前公務員事務局局長鄧國威突然「被辭職」，都令唔少識得佢嘅人好震驚。工聯會立法會議員麥美娟Alice原來「細細個」就識鄧國威，八方所指嘅細細個，係講緊佢嘅中學少女時代。
當年讀安柱中學嘅Alice話，葵青區有一年搞咗個徵文比賽，鄧國威係葵青區嘅專員，佢參加咗個比賽兼贏埋，獲委以重任做青年大使，當年就係由鄧國威頒獎比佢㗎嘞。
Alice話如果唔係嗰個活動，佢未必會從政，更加唔會喺今日做到立法會議員，所以對鄧離任都有不捨，認為對方任內都循規蹈矩，努力工作；至於新嘅公務員事務局局長張雲正，Alice話因為水貨問題同商品說明條例同對方認識，覺得對方幾有魄力，希望日後多啲溝通。