有朋友心情不好，大家問明原委，因她近日被人冤枉工作出錯，上司教訓。她不願食死貓，平日溫文，遇到被屈，竟十分火爆，非要還自己一個公道，連上司也愕然。後來水落石出，才知「理直氣壯」的聲音多大！
她說：「有就有，冇就冇──冇，不可以夾硬認，誰冤枉我都咒到落十八層地獄！」
可見真的不關她事，那麼抗辯也是人之常情。
早前立法會政改表決甩轆醜事，建制派的WhatsApp內容被洩密。頭號嫌疑犯由身份到衣着（常穿短褲）都被豬友（「豬一樣的隊友」簡稱）明嘲暗諷，呼之欲出了。其他人為洗脫二五仔嫌疑，都大罵或毒咒，只有一個支吾其辭：「到此為止吧」，算了？別追查了？實在詭異。
還有CCTVB某新紮姐仔，由公屋妹進駐何文田豪宅，有網友爆料，她未成名前曾是××廊夜場女。雜誌跟進訪問了在職女公關，對方聲稱：「佢做嗰陣，我都未喺度，呢度啲媽咪講過囉。」當事人的回應是：「講咗好耐啦！」──傳言可信嗎？是抹黑嗎？講咗好耐是真定假？如果沒做過，不用客氣，毋須忍辱負重，斷決否認還要告上法庭還一個清白！豈容誹謗？
世上所有尷尬、含糊、辭窮，息事寧人的反應，倒有點心虛了。