梁班子大地震，當中最惹注目嘅人事變動，當然係原任政制及內地事務局副局長嘅劉江華，升咗做民政事務局局長，集權一身統領18個區議會。嘩，由2012年立法會敗選後到做副局長再坐正做阿一，都係短短3年咋喎，難怪唔少人形容劉江華嘅仕途好似坐白金升降機啦！
但噚日仲有一則消息令一眾「熱烈地彈琴熱烈地唱」嘅劉華迷更嚇驚，就係有傳如果劉華呢兩年局長任期做得好，下屆政府有望做特區第二把交椅，即係政務司司長（Chief Secretary for administration，簡稱CS）、即係𠵱家林鄭月娥做緊嗰個位呀！
許曉暉有望坐正
吓，係真唔係呀？八方覺得，凡事沒有不可能，有政界中人就話，劉華一直係中央悉心培養嘅政治人才，阿爺想佢再更上一層樓，有乜咁奇呢？但佢不忘提點八方以及其他人，最重要都係睇吓邊個做特首啫。如果下屆特首唔係梁振英，劉華有冇得升呢？頓成問號嘞！
如果劉華冇得一如傳聞做特區阿二，政界相信最失望嗰個或者係民政事務局副局長許曉暉囉。官場一直盛傳，曾德成下屆退任後，許曉暉就要接上，所以佢留喺呢屆政府續放棄外出搵真銀，無非等2017年接任，點知𠵱家殺出劉華呢位「程咬金」，坐住佢個局長寶座。如果劉華下屆升官，許曉暉仲有一線生機頂上；若劉華留在原位，則許曉暉就白花呢5年心機。怪不得有政界中人笑，許曉暉最希望劉華步步高陞！
李八方
mailto:[email protected]