財政司司長曾俊華獲國家主席習近平「握手」後，特首梁振英不斷淡化事件，堅稱係「禮節性的握手」，十分正常云云，強調唔能夠將握手扯到特首選舉嘅問題上。事件主角曾俊華就話，外界過份解讀呢次握手，似乎都唔想太高調，莫非怕中暗箭？有熟悉中共權術謀略嘅人士就同花生友講，今次握手，唔輪到兩人作回應，阿爺亦唔會想聽兩位主角點樣睇。
收集各方評價
呢位人士話呀，中央高層同邊個握手，一定係事先計過度過，入場時，邊個人坐喺主席嘅左邊或右邊、有冇傳媒在場等，一切都係預先計劃好，而習近平身邊嘅智囊絕對唔會令習近平「握錯手」，所以討論呢次握手嘅意義前，一定要明白，握手一定有其政治意思。
其實習近平同曾俊華握手後，引起各方猜想係意料之中，但該人士分析，中央除咗想聽各方「嘩嘩」聲之外，其實更想各方人士包括泛民主派，私下又好、公開又好，多啲討論曾俊華係咪適合做特首，等中央知道各方對佢嘅評價。
該人士分析，中央絕對唔係敲定咗由曾俊華做特首，時間上亦唔現實，極其量只可以話，曾俊華係中央覺得可以考慮嘅人士之一，但考慮嘅人選可以好多，梁振英可以係、曾俊華亦一樣，中央就係透過呢次握手惹起討論，收集多啲評價，等中央做最終決定時有利無害，至少知道曾俊華嘅人緣、能力有幾大。
花生友