【本報訊】般咸道百年古樹倒塌的一剎那，姓梁司機（圖）正駕駛貨車經過，車尾被大樹壓毀。他事後猶有餘悸頻呼「好彩」，「如果壓落車頭，咁我咪玩完囉……駛慢一秒，我就唔可以做今次訪問啦！」亦有家住西摩道的街坊甘太形容塌樹一刻，「個個都大聲叫：『走，快啲走呀！』」場面觸目驚心。
「成個車斗唔見咗」
昨晨事發時，梁駕駛貨車到半山送海鮮後，沿般咸道返回西環公司。他指當時「行行吓聽到砰一聲」，於是立即下車查看，「見到車尾成個載有海鮮凍櫃嘅車斗唔見咗，嗰時先識得驚，原來成棵大樹壓咗落嚟，好恐怖！」他指對面線有一輛滿載的雙層城巴駛至，距離大樹僅兩個車位，「架巴士都好彩，如果開前啲，壓到正晒」。事後車長隨即開門，疏散乘客。
被大樹壓中的對面大廈，其中居民蔣太指其單位窗戶，以及外牆兩部冷氣機均被大樹壓毀，「玻璃碎跌晒入屋，兩部冷氣仲係新安裝」。幸好事發時她已上班，家內無人，「惟有當破財擋災！」
■記者溫瑞麟、簡明恩