前晚中證監公佈，為咗紀念抗戰勝利70周年，今年9月3日（周四）至9月6日（周日），A股要連休四日。有唔少股民覺得極之冇厘頭：抗日，關股市咩事？有心水清股民解畫：原來今年係習近平首次閱兵，中央要不惜任何代價，防止有敵對勢力喺股市搞搞震！
中共首腦主持閱兵，極有象徵意義。由毛澤東、鄧小平、江澤民、至胡錦濤，每一任領袖都至少要搞一次，以示英明神武，大權盡握。軍方背景的中航工業董事長林左鳴，最近連續兩日公開表態，話之前A股大跌，是有敵對勢力借機造空中國，意圖搞顏色革命，顛覆中共政權。
林左鳴言論，已經代表高層態度。如果大閱兵期間，A股再冧，就係要挑戰習總權威。中證監唯有休市避禍，以免出事，令龍顏大怒。
黃尹華