登登登凳！我要向各位觀眾隆重介紹一隻可能係香港史上最位高權重的貓──「石仔」！唔好睇小這隻貓，他年紀細細，無學歷無經驗無人脈，都可以在香港一間跨國廣告公司打出頭來，榮升CCO總監一職。據行內人士報料，該公司在一年前收養了石仔，由於他表現「出眾」，最近向全體員工發了內部通告，宣佈擢升他為Chief Cat Officer。一夜間，貓仔飛上枝頭，由人稱石仔改為石總，打破貓科界打工皇帝紀錄，稱他為「貓界霍建寧」當之無愧。
做人有時唔及做貓好。不是嗎？據聞這隻貓唔使做，終日行行企企已可享豐厚待遇，令一眾打工仔羨慕到暈。他獨佔無敵海景房，享有24小時任食Buffet，一年放足365日大假。最最最重要係，當各位打工仔做到似死狗，這位CCO卻攞正牌「吞pop」，心情好時四圍巡視業務，偶爾從電腦背後撲出，突擊檢查有無人偷懶；有時又會HR上身，在同事之間穿梭遊走收風八料。
雖然我未有機會親身拜訪石總，但卻側聞這隻貓的一段可歌可泣的奮鬥故事。石總本來在石排灣邨流浪，一直自強不息，努力搵食，終於守得雲開，得到有心人「引薦」到這公司來，從此由地底泥變成貓中之龍，簡直是獅子山精神的寫照！
一個office，得閒有隻貓走來走去，同事工作悶悶地，又可以和隻貓玩餐飽，提一提神，通一通腦，你話幾好。只可惜香港大部份的公司作風保守，又有幾多肯為office注入新意？在管理層眼中，office不是寵物店，更不是遊樂場，每天都忙到九彩，那裏有閒情養貓養狗？況且，公司不是開善堂，同事工作開不開心關我屁事？他們不明白，創意是需要自由的空氣，效率是需要快樂的土壤，無止境枯燥的做做做，只會萬劫不復。
Btw，石總雖則是貓，也有專屬名片，上有職銜和電郵，還有專人侍候。做貓做到咁有地位，我也寧願來生不做香港人，要學石總做隻富貴貓。
文廸晞
mailto:[email protected]