大專院校代表喺六四集會當晚焚燒《基本法》，帶出修改《基本法》嘅討論。近日立法會主席曾鈺成亦提到呢件事，但佢噚日澄清，唔係收到消息指中央有計劃具體修改《基本法》，只不過係幾個月前曾與內地學者、法律專家同負責香港事務嘅官員討論。佢仲話，《基本法》已經頒佈25年，條文只根據80年代嘅情況草議，但𠵱家中港關係已經有好大變化，中央承諾港人「50年不變」已經走過三分之一時間，「2047年之後香港點呢？各方都關注呢個問題，唔係咩奇怪嘅事」。
八方估唔到嘅係，曾鈺成竟然有日會同學民思潮黃之鋒啱嘴形，事關之鋒都認為要研究修改《基本法》。之鋒認為曾主席嘅言論係試水溫，對泛民嚟講係個警號，提醒泛民唔可以迴避修法，因為「我哋唔講，建制派都會講」。