剛剛過咗嘅星期日，大埔區議會進行補選，工黨郭永健創造工黨零的突破，建制派好快做個初步賽後檢討，都唔係完全不感意外。花生友就聽聞，有建制派中人歸納出兩大意外地方，第一就係今次鄉事票出得唔齊，第二就係估唔到敗選嘅羅曉楓，就算子承父業都有唔少鐵票。花生友聽建制派嘅口風覺得，佢哋已經準備好點樣喺年底嘅區議會換屆選舉反擊。
羅家鐵票穩固
呢位建制派中人同花生友講，鄉事票出唔齊呢樣嘢，佢哋都稍有預感，反正鄉事嘅動員能力素來唔算強，呢點可謂寄望不大。反而喺呢次補選之中，羅曉楓得到嘅票數就令建制中人感到意外，因為之所以有今次補選，就係由於羅曉楓嘅爸爸、即係當區原區議員羅舜泉犯法，繼而失去區議員資格導致嘅。羅曉楓喺呢場逆場波，竟然都攞到成三成票咁多，可見羅家嘅鐵票相當穩固。
除此之外，建制中人仲覺得今次建制派嘅負面宣傳做得唔好，相信因為建制派自己都有負面新聞在身，包括上個月政改表決甩轆同埋羅舜泉嘅醜聞，所以不便太明刀明槍咁做。
建制中人最後話，呢次補選，建制派只係輸咗個馬鼻，相信下次會集中火力谷一個候選人。泛民年底怕且都要醒醒定定，就算集齊力推郭永健，未必再夠票。
但花生友聽聞工黨對此都有心理準備，所以郭永健會喺幾個月任期內盡力扎根地區開拓選票。
花生友