恒地（012）主席李兆基（四叔）嘅外孫女李敬恩（Kristine）早前高調現身，正式擔大旗幫恒地旗下投資物業重塑品牌形象，佢噚日仲帶埋初出茅廬嘅三妹李瀅（Jacqueline）出席旗下大角嘴新商場嘅命名儀式，實行兩姐妹一齊多啲見大場面。
與姊亮相商場命名儀式
四叔長女李佩雯育有三女一子，大家姐Kristine嘅特徵係嘴邊有粒食癦，仔細望埋去，三妹Jacqueline左邊面都有粒細癦，妹妹身形較姐姐嬌小，笑起上嚟樣子一樣甜。
Jacqueline今年22歲，細過Kristine約5年；佢跟家姐一樣，都係喺美國史丹福大學畢業，不過佢計劃新學年再度負笈海外，攻讀碩士課程，所以𠵱家只係喺恒地做暑期工，汲取工作經驗，由於係實習性質，所以會喺唔同部門學嘢。
至於Kristine，佢係恒地租務部助理總經理，佢之前透露，除咗千色匯商場品牌系列，亦會參與一個規模更大嘅新零售商業項目。佢講嘅，應該就係呢個大角嘴商場「邁奧坊」，不過噚日佢同三妹都係在場觀摩，主要交由恒地老臣子──集團租務部總經理薛伯榮講解新項目。
「邁奧坊」係利得街、福澤街與角祥街4個舊樓重建項目嘅基座商場，夾埋有20萬方呎，共60個舖位。不過4座舊樓，有兩座仲未拆，成個項目應該仲有漫漫長路，Kristine咁早出嚟介紹呢個項目，可見佢真係好重視喎。
李華華
mailto:[email protected]