「夢想成真啦，我感到既謙卑又榮幸。」捱過風雨飄搖嘅五日賽事終於稱霸英國高球公開賽，難怪美國球手薩克莊遜（圖）捧盃時眼泛淚光。周一最後一輪，莊遜喺第18洞廿呎推桿得手捕獲「小鳥」，全日造出低六桿嘅66，總成績低15桿嘅273，仲喺四洞附加賽力壓南非奧斯度辛同澳洲利殊曼，成為稱霸英美兩大公開賽嘅第六人，兼袋走110萬鎊獎金。