香港噚日好熱鬧，兩位局長請辭尤其震撼政圈。究竟炒魷定係辭職？大家心知肚明。唔妥梁振英嘅人，惟有期望下屆特首選舉盡快開跑，希望在明天吖嘛。噚日被視為下屆特首熱門梁錦松出嚟搞咗個活動，「清潔大隊長」政務司司長林鄭月娥、勞工及福利局長張建宗更獻身「埋堆」，難道阿松咁快組班？
梁錦松係惜食堂主席，呢個機構專責食物回收及援助計劃。
佢噚日帶埋佢12歲似足「跳水皇后」伏明霞嘅囡囡梁司渝（Amy）、怕醜嘅10歲次子梁皓嘉（Edward）、眼仔睩睩兼淘氣十足嘅7歲細仔梁家瑋（James），以一拖三嘅陣容喺深水埗惜食堂社區中心，為惜食堂活動主禮。
活動係將捐出嚟畀弱勢嘅罐頭重新包裝，阿松同佢嘅小朋友即席示範，佢喺罐頭上畫咗5條蟲代表佢一家五口，寫上We love Hong Kong。
諷刺有人冇「誠」信？
活動係梁錦松一個人諗出嚟，仲度埋個名叫做「全『誠』罐膳心」，名字足夠惹人無限聯想。成篇新聞稿都冇解釋點解唔係「全城」，而要用「全『誠』」，仲要用個雙引號括住個『誠』字，係要諷刺有人冇誠信，定係向首富示好？
阿松話，希望活動會有「多啲年輕人參加」，發揮創意：「我知道香港年輕人係好有創意，所以透過佢哋發揮創意嘅活動，將愛心畀到有需要嘅人。」唔知香港嘅年輕人，喺梁振英同梁錦松之間，會揀邊個做特首？
活動另外設有「名人膳心罐」，由名人參加罐頭裝飾設計，透過網上進行慈善拍賣，收益會撥歸惜食堂，參與嘅名人，竟然包括林鄭月娥同張建宗，兩人真係十分支持阿松嘅工作嘞。
但咁快伸個頭出嚟話參選特首，只會遭黑材料招呼，又難怪阿松噚日重申，冇計劃參選特首，佢又大讚獲習近平主席握手嘅財爺曾俊華好努力工作，但佢話未聽聞過中央明年初會換人喎。
李八方
mailto:[email protected]