機坪重開後第二日，天氣相當差，晨課期間不停落雨，風勢亦好大，有段時間仲要係黃雨，搞到好多馬都要紛紛暫避，令機坪場面一度冷清清。全朝踱步馬有68匹，都係出自周一機坪重開首日派馬出操嘅七個馬房，包括賀賢、大摩、何良、姚本輝、蘇保羅、高伯新及蘇偉賢。
其中以蘇保羅最多馬出試，包括已經缺陣半年、體重逾1200磅嘅大隻仔「星航渡」，呢匹質新馬剛季初兩連捷，11月一役更大勝對手，盡顯潛力，可惜後來因為腳患，2015年冇出過賽，不過今季佢咁早復課，已經連續兩日露面，可見健康改善，只要重拾勇態，相信未來大有可為。
至於大摩嘅兩屆2000米新航國際盃盟主「花月春風」，呢日亦繼續現身踱步，呢匹馬明年1月就轉八歲，明顯大摩想趁佢退化前今季打快攻，盡量榨乾。「花月春風」係全材馬，近三屆冠軍一哩賽攞到一冠兩季佳績，並非只合長途，所以今季初10月嘅1600米二級賽沙田錦標，估計會係首個目標。