貴為「習一握」嘅財政司司長曾俊華，噚日啟程到福建、即係同佢金手一握嘅國家主席習近平政途發迹地訪問，周四先返港。鬍鬚曾啟程前喺機場被傳媒問到，除咗獲習近平握手外，新華社最近竟然搵佢做專訪、講阿爺最關注嘅一帶一路，擺明畀位佢上，特首行情看漲時，鬍鬚曾似乎覺得有乜咁大不了箒，佢回應話喎：「（傳媒）解讀得太過份，（選特首）根本冇呢啲事」。
其實鬍鬚曾唔可以怪傳媒喎，因為相對上京述職會見人大委員長張德江後，卻被新華社冷待嘅特首梁振英，佢真係獲官媒重視啲嘛。至於本港股市近日大幅波動，鬍鬚曾話本港係外向型經濟，受全球經濟不穩影響；至於希臘債務危機係咪有機會舒緩？佢認為希臘始終要靠改變本身嘅經濟結構先可以解決問題。