身在夏威夷度假嘅自由黨榮譽主席田北俊，因為冇跟建制派「豬一樣」大隊離場，坐定定就政改方案投票支持，唔單止事後獲中聯辦致電稱讚，連市民都對佢咁有主見like爆。八方唔係亂講，睇睇港大民意研究計劃最新民調結果就知嘞。
曾鈺成冧莊榜首
港大民研最新喺今個月13至16日進行的調查顯示，雖然喺建制派WhatsApp洩密風波中被揭落場指導埋建制派點踢波，有違中立原則，但立法會主席曾鈺成似乎冇受影響，續以61.3分喺十大議員排名榜中排第一，雖然比起4月、即係未投票前嘅評分都跌咗2.1分。
而上次冇入十大嘅田北俊則重新入榜，以55.3分殺入第二，排喺曾鈺成之下，但八方相信田少更開心嘅係，佢力壓同佢喺政改甩轆風波中鬧過交嘅細佬田北辰。二少以54.3分排第三，較4月時跌0.8分。而葉劉淑儀、即係二少所屬新民黨嘅主席，則以51分排第四，較4月時升2分。雖然前4位係建制囊括，餘下5至10位卻清一色由泛民包辦，上次喺十大嘅人民力量陳偉業今次就跌出榜。