本欄曾提及，A股獨步全球好難預測，至今唯有豬市預測法最準，豬市與股市走勢相反，25年來幾乎鋪鋪中。原因係內地通脹數據經常有水分，但豬肉價一目了然，如實反映物價水平，最終影響阿爺貨幣政策。
最神奇係，豬肉價走勢通常領先股市三個月左右，今次亦不例外。今年3月，豬肉價終止之前九個月跌勢，轉為上升，到6月A股就開始插水，豬市預測法再奏奇效。
如果睇豬肉價走勢，A股後市非常不樂觀。四個月內，內地豬肉價已升超過四成。天時熱、食慾低，夏天係豬肉淡季，價格已經勁升，到冬季豬肉旺季更不得了。業界分析，因為啲豬農而家先肯增加豬仔，最少都要養八個月先可上市賣，至年底前豬肉價都有升冇跌。如果按豬市預測法計，今年A股前景恐怕麻麻。
黃尹華