新界王劉皇發早前退位畀囝囝劉業強做鄉議局主席，但發仔上任冇耐，就傳出同副主席張學明不和嘅傳言。噚日鄉議局開執委會，八方問過發仔本人，佢話點解有呢個說法真係要問番傳媒先知，而佢同張學明噚日喺開會前都有傾有講，似乎係想用行動闢謠。
傳發仔與張學明不和
咁發叔自己又點睇阿仔盛傳同自己多年拍檔張學明有嫌隙？噚日有出席會議嘅發叔話：「唔係嘅，乜嘢都係作古仔，新聞界朋友想像力好豐富……」被問到鄉議局立法會功能組別議席，使唔使搵定接班人、定係佢自己再連任？「（自己）鄉議局個（立法會）位都夠期，要睇自己健康，如果健康向好發展，我都有興趣參與鄉議局嘅工作」。
八方噚日見發叔雖然要用枴杖，但精神好好，鄉議局執委上前問候佢時都話發叔好氣色。據了解，啲鄉紳都覺得發仔未有江湖地位壓場，萬事都係有發叔睇住檔好啲，有人建議稍後開個榮譽主席位畀發叔，等佢做太上皇鎮住大局，噚日開會，有執委都叫發叔上台坐，但發叔堅拒，可能費事無名無份都上台，只係喺台下坐鎮。