出名勤力嘅「超人」李嘉誠，原來不時都會睇電視消遣，而佢其中一間最欣賞嘅電視台就係鳳凰衛視，睇電視仲幫到佢捐錢㖭喎。
話說佢今年1月10號收看一個叫《問答神州》嘅節目，入面訪問咗中國人體器官捐獻移植委員會主任委員黃潔夫，佢大爆內地死囚被迫捐器官嘅黑幕，超人睇到好感動，之後就決定捐錢畀黃潔夫，希望內地器官捐贈更文明。
超人透過李嘉誠基金會，捐出800萬元人仔畀中國器官移植發展基金會，作為種子基金。
查實呢個器官移植發展基金會早喺1995年成立，但多年來都搞唔起，直至習近平上場，點名要黃潔夫重新推動器官捐贈更文明，先促成基金會重新上路。
黃潔夫本身係一位著名肝移植專家，之前曾經診治前全國人大常委曾憲梓、「愛國商人」霍英東等政商界名人，喺業界赫赫有名。
佢今次獲超人力撐，聽聞好多有錢人亦響應捐款畀基金會。中央財政部亦計劃撥款2,000萬元人仔，要求未來按病情分配移植，清除以往有錢人優先醫病嘅社會弊病。