太古地產（1972）位於東半山司徒拔道嘅OPUS HONG KONG傲璇，之前賣咗6個單位，都唔見強國人蹤影，賣到第7個終於似係強國人嘞。
公司上月底以接近4.6億元，賣出地下連1樓B室複式巨宅，單位實用面積4,819平方呎，呎價約9.54萬元，屬全亞洲第二貴住宅，買家身份噚日曝光，仲可能係OPUS首位內地客。
土地註冊處資料顯示，買家叫王薇（Wang Wei），拼音串法似係內地客，兼且同上海富豪新理益集團董事長劉益謙嘅太太同名同姓，唔知係咪同一個人。買家如果冇香港三粒星身份證，買樓時要畀稅1.08億元。
OPUS其實只得12伙，首6個單位嘅買家分別來自丹麥、柬埔寨、台灣同香港，市場一直奇怪強國人點解唔吼，有人話太地賣樓時都會睇吓買家身份，亦有人話呢度設計唔係四四正正，唔啱強國人嘅傳統口味，所以相對較多外國人鍾意。