早前大台嘅姐仔們就發生咗一單「電話離奇失蹤事件」，當時「新一代宅男女神」陳瀅(Jeannie)就拍完劇，發現唔見咗個電話，最後個電話原來喺楊秀惠個篋入面。楊秀惠就話都唔知點解會發生呢件事，不過楊秀惠就話同陳瀅好好朋友，所以得啖笑。
表面係咁講，但實際上又點呢？昨日就係楊秀惠嘅生日，前晚佢一班好姊妹就幫佢慶祝生日，而陳瀅都有出席，唔只出席，仲準備咗個蛋糕。楊秀惠一口氣貼咗多張圖，寫道：「謝謝，妮妮(許亦妮)、Jeannie陳瀅女神的蛋糕，我太愛了，還有太多的好友，由於工作關係無法出席，你們的祝福我都收到了，太愛你們的，接下來的幾個星期，繼續慶祝！！」唔似有心病囉(好似係)…咪住先，花生呢？
是咁的，楊秀惠貼咗好多張party相啦，其中呢張壽星女合十許願嘅，咦，支香檳不偏不倚，啱啱好遮住咗女神陳瀅個樣……真係咁巧合喎!如果有心揀靚相的話，點會咁唔小心揀著呢張0架…影嗰陣又冇人為意喎……(正所謂女人心係咪？)仲有，楊秀惠就狂貼生日相，但到賀嘅陳瀅就冇貼合照，只係貼咗張單人相……
另外楊秀惠仲貼咗條片，就係佢哋打算開香檳，不過都未有人掂支香檳就自動開咗，嚇到成班女仔大叫。