政府宣佈漁農自然護理署副署長梁肇輝（圖）會喺本月25日接替黃志光，出任漁護署署長，黃則喺同日喺服務咗35年嘅政府，開始退休前休假。公務員事務局局長鄧國威大讚黃志光勇於承擔，出任署長期間率領部門，預防同控制禽流感同狂犬病等。
而現年51歲嘅梁肇輝喺1991年8月入政府，由漁業主任做起，2005年12月升任漁護署助理署長，2010年1月再升至副署長，今年終於坐正。八方聽聞梁肇輝有「蝦博士」之稱，以前主管漁業，有份促成香港休漁期嘅落實，署內聲望良好，有承擔、EQ高，但𠵱家做部門首長唔係有料就得，仲要夠蠱惑，同事擔心「蝦博士」坐正後會變「被人蝦博士」。