希臘債務危機令當地立立亂，唔少人最近都對呢個旅遊勝地有啲卻步，諗住等火頭冷卻番先再去；就算投資去當地，都怕有事起嚟會血本無歸，都好少人咁勇，走去低撈資產。
不過，股神諗嘢就同凡人唔同嘞，正如佢句金句「別人恐懼時我貪婪」一樣，有希臘報紙話，股神畢菲特與意大利發展商Alessandro Proto，將會夾份拎出1,500萬歐元（約1.26億港元），買起愛琴海西北部一個島仔，而且有意喺個小島上發展房地產。
聽講希臘政府為咗得到國際債權人放水援助，已經願意出售十幾座私人島嶼，諗住籌夠500億歐元。
而今次會賣嘅島就叫聖湯瑪斯島（Agios Thomas），位於愛琴海西北部，總面積為121公頃，島上海灘水清沙幼。如果成事，就係會繼靚仔明星尊尼特普早前用420萬歐元買咗個Stroggilo小島後，再有外國人買入希臘小島嘞。