由會德豐（020）嗰位運動型主席吳宗權所搞嘅公益金百萬泳，將於今年10月25日舉行，除咗每年都有嘅領袖賽，今年新增一項「黃金一公里」耐力賽，此乃公開賽，參賽者先游畢500米，再喺沙灘競跑，再落水衝刺500米就完成賽事。
公益金百萬泳舊年都有一個類似嘅耐力賽，合共游800米，中間都要喺沙灘跑，有廿多人參加。活動籌委會成員，包括吳宗權、利豐（494）馮氏家族嘅馮裕津、東亞（023）副行政總裁李民橋，同埋中港照相（1123）副主席孫道弘等四位公子見舊年反應不俗，於是決定今年嚟個加強版，游夠一公里。
至於最叻游水嘅吳宗權舊年冇參加呢項賽事，聞說佢仲諗緊玩唔玩，不過，四位公子一早講明會鼎力支持百萬泳，落水應該就肯定㗎喇，只係睇佢哋係咪每項比賽都落場㗎啫。