受多名國際足協前度及現任高層被美國拘捕嘅貪腐醜聞影響，現任主席白禮達（圖）早前終於宣佈唔撈，做到選到新主席為止，所以國際足協班執委禮拜一喺瑞士蘇黎世開會，傾吓嚟緊幾時舉行大選。最後，佢哋決定喺出年嘅2月26號舉行，歐洲傳媒指，唔少國家嘅足總都支持歐洲足協主席柏天尼參選。
完咗大會之後，白禮達就去開記招，會面傳媒，點知俾人踩場。我哋香港有毓民、長毛掟蕉、抬棺材，歐洲亦有英國諧星西蒙布洛堅（小圖），佢就混入去記招會場，突然行上個台度，畀咗叠假銀紙白禮達，仲話呢啲錢係北韓為咗申辦2026年世盃畀佢嘅，諷刺白禮達帶領嘅國際足協腐敗不堪！白禮達呢隻老狐狸好冷靜，冇話好嬲，即刻叫保安嚟捉走西蒙布洛堅，而後者就一手向白禮達灑假銀紙。在場班攝記即刻舉機，影到白禮達坐喺漫天嘅假銀紙之中。最後啲着住西裝嘅國際足協職員嗱嗱臨執乾淨地吓啲假銀紙，等個記招繼續進行。
識睇，一定係睇足英台【英波Live】：
http://soccer.appledaily.com
http://bit.ly/engballlive