東華三院噚日舉行「東華精英嘉許禮暨東華才藝展繽紛」，表揚體藝精英學生，仲有獎學金畀10位艱苦奮鬥嘅學生。
鼓勵出國比賽
其中一位獲獎學金嘅學生，係喺東華三院徐展堂學校讀中五嘅區俊華，有輕度智障，喺單親家庭長大，由婆婆照顧，家境清貧申領綜援。但跑步出色，喺第六屆中國特殊奥運拎咗三面金牌，嚟緊代表香港出戰喺美國舉行嘅「2015特殊奥林匹克夏季世界比賽」，佢話「有信心，三金」。
而另一位獲獎學金嘅學生陳梓朗，讀東華三院辛亥年總理中學中五，中一入選學校手球隊，但父母收入唔穩定，唔好意思拎錢買幾百蚊嘅手球鞋，就着白飯魚訓練。雖然體育老師送咗對鞋畀佢，但佢唔捨得用，淨喺比賽嗰時着，結果搞到雙腳膝蓋發炎，連行路返學都有問題，錯失出國比賽機會。佢獲學校頒5,000蚊獎學金，希望佢未來有機會代表香港出國比賽。