咩叫人細鬼大？自由黨榮譽主席田北俊孫仔嘅「傑作」，或者係一例。身在夏威夷度假嘅田少，又喺facebook放相update自己嘅行蹤，畀支持者貼身跟蹤。
繼早前放咗張着短褲、露肉腿嘅抽水相後，田少最新嘅相，係就繼續有佢嘅靚仔樣，但似乎唔係焦點喎，事關喺戴帽、插袋喺沙灘留影嘅佢後面，有位着住三點式嘅泳衣女好搶鏡噃！
田少似乎都發現被搶風頭，喺fb酸溜溜留言：「找亮點！張相係我個9歲孫仔影嘅，其實佢係想影我定影後邊個女仔?!」有網民就大讚孫仔「青出於藍」、認為孫仔呢招叫「聲東擊西」，當然唔少人話孫仔「人細鬼大」。