今年初向西九管理局請辭嘅行政總裁連納智，下月初離任，到底邊個接棒，梗係好受外界關注。八方聽聞，西九管理局對接班人選有心水，到底邊個咁被睇得起？據聞係現任西九營運總裁、前運輸及房屋局常任秘書長栢志高。
據了解，西九管理局今日開會，其中一項議程係建議栢志高接替連納智做CEO（Chief Executive Officer）。八方了解過，管理局對栢志高頂上未算有太大爭議，但唔知係咪聽日就已經有決定。
其實去年底西九管理局委任栢志高空缺新職做營運總裁，都惹起外界議論紛紛，質疑政府係咪想搵個前AO𥄫住連納智？八方聽聞今次建議栢志高更上一層樓，係想佢搞番掂盤數，因為西九已經嚴重超支，最怕爛尾收場。