中航工業兼中航科工（2357）董事長林左鳴上周末表示，A股之前暴跌，係因為有敵對勢力對中國發起經濟戰爭，以圖顛覆共產黨的執政地位。佢話A股6月18日開始暴跌，正值香港政改擱淺當日，敵對勢力此時出手打擊中國股市，用心險惡！
林左鳴話，察覺到有惡意勢力介入後，中航工業黨組立即成立指揮部，準備咗數十億真金白銀，並搵佢稱「股神」的財務專家，打呢場A股保衞戰。至於林左鳴本人也出手，增持咗中航工業旗下A股中直股份共2,000股，保家衞國。報道出街後，噚日內地股民幾乎一面到鬧爆林左鳴，好多人質疑，國企領導咁嘅思維，難怪股票冇人要。但亦有股民表示，非常欽佩林董，面對如此強大險惡的敵對勢力，佢毫無畏懼，竟然豪擲萬金買2,000股，簡直係愛國典範。
黃尹華