人稱「細孖」嘅工黨秘書長郭永健喺大埔區議會新富選區補選勝出，唔單止為工黨喺區議會帶來零的突破，花生友噚日同泛民中人傾開，唔少人都話士氣大振，皆因早前各派人馬都預測，佔領後泛民區選選情唔樂觀，但呢場雨傘運動後首次建制、泛民對決嘅選舉卻由泛民勝出，為11月區議會選舉打咗支強心針。
建制派策略出錯敗選
之不過，花生友都要喺大家熱烈地彈琴熱烈地唱之際，潑一潑冷水。睇番郭永健嘅兩個對手何萬傑、羅曉楓，講到無黨派實質係建制派，如果唔係二個建制派唔可以選前協調只出一個，令補選出現建制派分票情況，郭永健都幾難贏到。睇番何、羅合共得票係2,258，同原新富區議員羅舜泉2011年區選攞到2,129票相若，證明建制基本盤係冇流失到㗎，只係佢策略有錯。
有泛民中人笑言，今次選舉對「傘族」係一個啟示，事關多個傘後組織喺佔領後落區深耕，為民主播種，仲有意參與區議會選舉，本來都係好事，因為都希望多啲人為民主獻身，有啲新鮮感，但同時卻不時聽到佢哋同泛民政黨撞區喎，而佢哋又似乎唔多願意同泛民協調出選區份。唔協調嘅下場係點？呢位泛民中人話新富開票結果可預視一二。但花生友亦聽過傘族反問：「憑乜要人讓路成全（泛民）？」、「佢哋（如果）咁叻，18區區議會就唔會一片紅啦！」
花生友