學民思潮召集人黃之鋒呢排經常現身書展，宣傳佢嘅新書《我不是細路——十八前後》，八方去過現場，都見到佢有唔少粉絲排隊問佢攞簽名，好鬼受歡迎，點知之鋒喺粉絲十卜下仲有意外收穫，就係一封來自「內地小朋友」嘅鼓勵信。
之鋒喺facebook貼咗呢封信，信中嘅內地小朋友親述「冒死來買書」、並設法帶過關，而寫信目的就係希望之鋒知道，「這個世界上還是有很多在高牆內都仍然想看到真相的人」，所以佢都盡力將真相話畀身邊人聽，仲話如果係香港人，一定入學民思潮㖭。
之鋒就以《入陣曲》嘅歌詞作回應，話對比起中國拚命翻牆先能找尋真相嘅人，港人已相對幸運，所以更加有責任堅持下去，亦希望呢位15歲嘅「內地小朋友」如願來港升讀大學。