今年就50歲嘅羅霖前晚宣佈會用「美魔女」身份殺入樂壇做歌手。相反年屆39歲嘅華人天后歌手李玟（CoCo）就繼續養尊處優，享受緊佢嘅悠長暑假。CoCo噚日中午就喺微博同Instagram度，上載咗兩張去度假嘅相，識睇嘅梗係睇CoCo件紫色比堅尼所包藏住嘅火辣身材，CoCo留言話：「Bikini time……Summer」明顯係用嚟招呼網友，亦唔會因為放假放棄呢個晒事業線嘅機會。而一班網友反應都非常活躍，有網友見到啲相就忍唔住話：「CoCo姐，不用這麼性感吧！」又有網友話：「受不了！鼻血！」
眼利網友指起斑
CoCo另一張素顏戴上草帽用手遮住半邊面嘅相，寫住「Summer！最愛暑假！」因為冇事業線關係，網友留言就冇咁活躍，但好多留言都係讚佢靚。但亦有眼利嘅網友就睇到CoCo臉上有啲瑕疵喎，留言：「老大好美，不過怎麼看起有斑了~~」
撰文：馮仁昭