Eddie(彭懷安)早前被指再出軌，搞到同未婚妻朱慧敏嘅婚事煞停同陷入冷戰，近日又有報道指佢哋兩個因為生仔而出現問題，有指朱慧敏因為家族有乳癌遺傳病史而唔生B，但身為長子嘅Eddie就堅持要傳宗接代，最後意見不合分開，個個網民都認為朱慧敏應該「分手要狠」，但昨日就有報道指佢哋只係假分開咋。
早前朱慧敏出席活動就將Eddie由未婚夫「降呢」做生意夥伴，但Eddie整傷隻手，朱慧敏就向傳媒交待傷勢，而昨日就有報道影到，Eddie 喺11號下午喺朱慧敏位於清水灣半島嘅寓所步出，仲左望右望有冇記者，極有可能之前一晚於上址過夜，Eddie以為冇記者之後，就上咗小巴離開。
報道又指有知情人爆料，話朱慧敏冇份做大台嘅處境劇，所以本來一早疊埋心水做老闆娘，點知Eddie搞單咁嘅嘢。 不過其實佢哋兩人一向糖黐豆，件事之後亦一早好番，既然冇咗大台份糧，朱慧敏惟有借「分訊」出活動搵真銀，補貼下咁話喎。